Eze 25 | NdeIBE | STEP | Ilizwi likaJehova lafika kimi lisithi:

Ezekiel 25

Isiphrofetho Ngokumelana Le-Amoni

1 Ilizwi likaJehova lafika kimi lisithi:

2 “Ndodana yomuntu, khangelisa ubuso bakho umelane lama-Amoni, uphrofethe okubi ngawo. 3 Tshono kuwo uthi, ‘Zwanini ilizwi likaJehova Wobukhosi. Nanku okutshiwo nguJehova Wobukhosi: Ngokuba lina lathi “Aha!” ngendlu yami engcwele lapho yayingcolisiwe langelizwe lako-Israyeli lapho lalichithiwe kanye langabantu bako-Juda lapho babethunjiwe, 4 ngakho ngizalinikela ebantwini baseMpumalanga njengenotho yabo. Bazakwakha izihonqo zabo bamise amathente abo phakathi kwenu; bazakudla izithelo zenu banathe lochago lwenu. 5 Ngizakwenza iRabha ibe lidlelo lamakamela le-Amoni ibe yindawo yokuphumulela izimvu. Lapho-ke lizakwazi ukuthi nginguJehova. 6 Ngoba nanku okutshiwo nguJehova Wobukhosi: Ngokuba liqakeze izandla zenu lagida langezinyawo zenu, lithokoza ngabo bonke ububi benhliziyo yenu ngelizwe lako-Israyeli, 7 ngakho ngizakwelula isandla sami ngimelane lani ngilinikele njalo ngiliqede emazweni. Ngizaliqothula, njalo lizakwazi ukuthi nginguJehova.’ ”

Isiphrofetho Ngokumelana LeMowabi.

8 “Nanku okutshiwo nguJehova Wobukhosi: ‘Ngenxa yokuthi iMowabi kanye leSeyiri athi, “Khangelani, indlu kaJuda isinjengezinye izizwe zonke,” 9 ngakho-ke ngizakwambula uhlangothi lweMowabi, kusukela emadolobheni asemingceleni – iBhethi Jeshimothi, leBhawali Meyoni kanye leKhiriyathayimi – udumo lwelizwe. 10 Ngizanikela iMowabi ndawonye lama-Amoni ebantwini baseMpumalanga njengenotho, ukuze ama-Amoni angakhunjulwa phakathi kwezizwe; 11 njalo ngizaletha isijeziso eMowabi. Bazakwazi ukuthi mina nginguJehova.’ ”

Isiphrofetho Ngokumelana Le-Edomi

12 “Nanku okutshiwo nguJehova Wobukhosi: ‘Ngokuba i-Edomi yaphindisela endlini kaJuda yasisiba lecala elikhulu ngokwenza njalo,

13 ngakho nanku okutshiwo nguJehova Wobukhosi: Ngizakwelula isandla sami ngimelane le-Edomi ngibulale abantu bayo kanye lezifuyo. Ngizayichitha, njalo kusukela eThemani kusiya eDedani, bazabulawa ngenkemba. 14 Ngizaphindisela e-Edomi ngesandla sabantu bami u-Israyeli, njalo i-Edomi bazayiphatha mayelana lentukuthelo yami kanye lolaka lwami; bazayazi impindiselo yami, kutsho uJehova Wobukhosi.’ ”

Isiphrofetho Ngokumelana LeFilistiya

15 “Nanku okutshiwo nguJehova Wobukhosi: ‘Ngokuba amaFilisti enza impindiselo njalo aphindisela ngolunya ezinhliziyweni zawo, njalo ngenzondo yasendulo afuna ukuchitha uJuda, 16 ngakho nanku okutshiwo nguJehova Wobukhosi: Sekuseduze ukuba ngelule ingalo yami ngimelane lamaFilisti, njalo ngizaqothula amaKherethi ngichithe lalabo abaseleyo ngasolwandle. 17 Ngizakwenza impindiselo enkulu kubo njalo ngibajezise ekuthukutheleni kwami. Ngakho bazakwazi ukuthi nginguJehova, lapho sengiphindisela kubo.’ ”